نصائح منزليه حلوة أوي تعالي اقولك عليها
===========
1. لو هتخزني طماطم اغسليها وقطعيها في حله مع بصل وتوم وفلفل رومي وفلفل حراق وحبة ملح وتوابل وشويه زيت وسبيهم يتسبكو مع بعض واضربيهم في الخلاط وشليهم في اكياس وعلي الفريزر ...وبتطلعيها تحمريلها توم وتتسبك كويس بيها وبتنفع للبيتزا والمكرونه وللسندوتشات بدل الكاتشيب
2 . لو طعم الثوم كان زايد في الاكل و حسيتي انك مزوده الثوم اوي حطي على الاكل بشرة جنزبيل خفيفة .. هتقلل شوية من طعم الثوم الزايد في الاكل
3 . لو الرز اتلسع منك ( اساسي ) اوعي تجيبي المعلقة و تقلبي و تجيبي فوقيها تحتيها .. الي هتعمليه بالظبط الاتي :
هتجيبي رغيف عيش عندك .. و تشيلي الحلة من فوق النار خالص . و تحطي رغيف العيش على وش الحلة دقايق . عشان يمتص ريحة الشياط ..
طيب لو افترضنا ان معندكيش عيش ...
هتجيبي بطاطساية صغيره ,, و تقطعيها صوابع كانك هتحمريها .. و رشقيها في الحلة و غطي الحلة دقايق .. هتمتص بقي ريحة الشياط تماما . . وبعدين انقلى الرز اللي فوق من غير ما تكحتي الحلة .. في حلة جديدة سواء هيكمل تسوية أو لاء
طيب لو مفيش عيش ولا بطاطس .. ارمي الرز بقي واعملى واحد جديد .. عشان انتي كده خنقتيني .
4 . لو بتديقك ريحة الجمبري وهو بيتسلق و بيأثر على ريحة البيت كله .. وهو بيتسلق حطى في ماية السلق كسبرة خضرة .. هتمتص الريحة الى حد كبير .
5 . عشان تدي للفراخ وقت السلق نكهة جميلة و مميزة .. قبل ما تحطيها تتسلق .. احشي ما بين الجلد و لحم الفرخة نفسة
خلطة عبارة عن .. بصل مفروم و ملح وفلفل و قرنفل و حبهان و عودين قرفة .. ادعكي الخلطة دي كويس في بعضها و احشي بيها الجزء الي قولتك عليه .. هتلاقي طعمها بعد السلق احلى .
6 . لما تيجي تغسلى اي خضار .. هاتي طبق كبير و امليه ماية و معلقتين تلاتة كبار خل و معلقتين ملح .. وخطي الخضار 3 او 4 دقايق بس .. هيقضي على كتير من الجراثيم .. و هيسهل عليكي عمليه التنضيف .
7 . لو عندك كمية كبيرة من الطماطم و قررتي تعمليها صلصة و تحفظيها في التلاجة .. هتفرميها و تصفيها عادي و تحطيها تتسبك عالنار .. عشان تحافظي على جودتها فترة اطول .. وهي في مرحلة التسبيك .. حطي عليها معلقتين صلصة طماطم جاهزة هتعيش معاكي اطول بكتير .
8 . وانتي بتحمري بتنجان او فلفل او ممبار او فراخ او اي حاجة من الحاجات الي بتحدف زيت و تلسوع ايدينا دي .. وانتي بتسخنى الزيت في الاول قبل ما تحطي اي حاجة حطي معلقة ملح و قلبيها في الزيت .. هتقلل كتير من الطرطشة الي بتحصل دي .
9 . لو بتسلقى لوبيا او فاصوليا بيضاء .. متارميش ماية السلق .. ابقي خدي نصها مثلا في الصلصة الي هتعملى فيها الطبيخ . بتدي للاكل قوام و نكهة احلى من لما تستعملى شوربة عادية .
10 . لما تيجي تعملى الفراخ البانية .. احنا بنحطها في البيض و بعدين نغطيها بالفيجيتار او البقسماط المطحون ..
مرحلة انك تغمسيها في البيض دي بقي .. هتجيبي البيضة او البيضتين الي هتستعمليهم . و اكسريهم في الطبق و حطي معاهم ربع كوباية حليب واضربيهم .. هتفرق معاكي في ايه بقي
اولا : هتدي طعم لذيذ للفراخ الي المفروض انك متبلاها طبعا من فترة
ثانيا : هتساعد ان الفيجيتار او البقسماط مينفصلش عن الفراخ وقت التحمير
وعشان تضمني اكتر واكتر ان البقسماط او الفيجيتار ميسرحش في الطاسة و يسيب الفراخ او حتي البفتيك .. هتعملى الي قولتك عليه و تجيبي طبق كبير ترصي فيه البوفتيك او الفراخ البانية بعد ما غطتيها بالفيجيتار او البقسماط وحطيها في الفريزر عشر دقايق قبل التحمير .. اتحداكي لو فكت منك .
11. من افضل تتبيلات الحمه هي مية البصل والفلفل الاسود بس تسبيها شوية في التلاجه وتسويها في الحله علي نار هاديه او تشويها .
ليست هناك تعليقات:
إرسال تعليق